Жарқўрғон туманидаги "Қизилмазор" мотосўқмоқларида Жарқўрғон туман ҳокимлиги ҳамда вилоят Мудофаага кўмаклашувчи “Ватанпарвар”ташкилоти ҳамкорлигида мотокросс бўйича Ўзбекистон Республикаси чемпионати ҳамда биринчилиги бўйича 1-босқич мусобақалари бўлиб ўтди. 

   Бу ерда ҳарбий қисмлар томонидан кўргазмалар ташкил этилгани, турли спорт мусобақалари ўтказилган ҳолда санъаткорларнинг концерт дастурларини намойиш этгани томошабинларни ўзига чорлади.

   Шундан сўнг, мотокросс баҳсларида иштирок этувчи спортчилар ва жамоалар таништирилиб, беллашувларга старт берилди.

   Қизғин беллашувлару, турли трюкларга бой кечадиган мотокросс беллашувлари якунида ғолиб ва совриндорлар аниқланди. Унга кўра, 750 см³ ҳажмли кажавали мотоциклда 1-ўрин Сурхондарё вилояти вакиллари Ш.Ҳазратқулов ҳамда А.Эргашевларга, 500 см³ мотоциклда ғолиблик Бухоролик Б.Ҳалимбоевга, “ЧЗ” маркали мотоциклда Навоийлик М.Галиевга, 125 см³ мотоциклда Тошкент вилоятидан А.Сазановга, 85см³ мотоциклда Навоийлик В.Смишляевга, 65см³ мотоциклда Тошкент вилояти вакили Н.Кузнецовга, ёшлар ўртасида 125см³ мотоциклда Бухоро вакили Ж.Самадовга насиб этди. Умумжамоа бўйича олганда эса 1-ўрин Тошкент вилояти жамоасига, 2-ўрин Бухоро вилояти жамоасига, 3-ўрин эса Тошкент шаҳри жамоасига насиб этган бўлса, ёшлар ўртасидаги баҳсларда 1-ўринни Бухоро вилояти жамоси, 2-ўринни Андижон вилояти жамоаси, 3-ўринни Сурхондарё вилояти жамоси қўлга киритдилар.

Жарқўрғон тумани ҳокимлиги Ахборот хизмати.